درس في التسامح

اليوما قررت بكل الدكتاتورية إلي انجم نمارسها في نطاق البلوڨ متاعي و نعاود ونقول متاعي باش نلقي عليكم درس في التسامح والاهم هو نعطيكم التعريف المطلق إييييييه المطلق متاع كلمة تسامح بموجب السلطة إلي وكلتها لنفسي بعد إنتخابي لروحي مدونة في البلوڨ متاعي.
ايا مالا ناخولكم شوية تعريفات للمصطلح العجيب هذا إلي يآآسر يحكيو عليه في التلفزة و يآآسر يستعملو فيه ممكن و نقول ممكن (إن بعض الظن إثم) ما يعرفوش شمعناها اما لمّوضة والشعب التونسي عيّاش و يحب استهلاك الحاجات الجدد و منهم الكلمات بيانسو، ايّا منطولش عليكم هاي الموسوعة الإلكترونية ويكيپيديا شنوة قالت :
"يعتبر التسامح والتساهل الفكري من المصطلحات التي تُستخدم في السياقات الاجتماعية والثقافية والدينية لوصف مواقف واتجاهات تتسم بالتسامح (أو الاحترام المتواضع ) أو غير المبالغ فيه لممارسات وأفعال أو أفراد نبذتهم الغالبية العظمى من المجتمع. ومن الناحية العملية، يعبر لفظ "التسامح" عن دعم تلك الممارسات والأفعال التي تحظر التمييزالعرقي والديني. وعلى عكس التسامح، يمكن استخدام مصطلح "التعصب" للتعبير عن الممارسات والأفعال القائمة على التمييز العرقي والديني الذي يتم حظره.."

هاي طلعت تحكي على الاقليات نشوفو نلقاوش حاجة اخرى، نشوفو بالسوري شنوة فمّه! و من الإجابات إلي لقيتها هي الآتي: 

  

"La tolérance c'est laisser faire mais peut être pas accepter!! tolérer qqun chez soi, ne veut pas dire heureux de l'y inviter!!"

"Tolérer (pour moi) c'est d'être "obligé" (sans pour autant en être convaincu), d'accepter une situation ou un fait quelconque, en se retenant d'y intervenir pour rabattre ce dernier à une vision propre à soi.
"

باهي نمرو توّا للحاجات والمفاهيم الي سمعتها عند الشعب التونسي،اشهر وحدة فما شكون يقلك"انتي ماكش متسامح و ماتحترمش معتقدات غيرك و تسمح لروحك باش تحكي على المقدسات وبالتالي تعتدي على مليار شخص و شوية صرف"
فما زادة "إنتي ماكش متسامح خاطرتكتب على فايسبوك افكار موش كيف الناس و هذا يجم يجرح العباد وانتي ماتقراش حساب جرح العباد "

لاعلينا، اليوما كيما قلت نحب نعطي درس في التسامح، الكلمة موش المعنى، التسامح كلمة تعملت للممارسة مع الاقليات؛ تطبقها الاغلبية مع الاقلية معناها منجيوش إل انسان ينتمي للاقليات نقولولو ماش متسامح، والتسامح هو واحد كيف يطفي الضو على افكار و ممارسات الاقلية و مايحالوش باش يمسهم بفعل ( موش قول) ومايحاولش باش يفرض عليهم حاجات بالقوة باصطا.
وفي الحالات الي نتهم فيهم بعدم التسامح يكون الشخص ينتمي من دون جدال للاغلبية الساحقة والحجج المقدمة غالبا تكون: ماتحترمش الناس و تسب فيهم خاطر تقول في كلام قوي يستفز مشاعرهم من خلالل تهكمك على معتقداتهم

نحب نقول إلي مادامنا نحكيو عالافكار موش الناس، عنا الحق نحكيو كيما نحبي، تهكم موش تهكم، موش باش نقعدو نفرزو والافكار المسمات معتقدات ماهي الا افكار مقدسة عند بعض من الناس موش الناس لكل، والي الناس تهيج و تعتبرو استفزاز ماهو الي طريقة تعبير وموش باش نحددو الافكار متاع الناس ونعملو قوانين في طريقتهم في التعبير عن رايهم. وواحد كيف هو موش مستانس بالنقد وحسّاس اكثر ماللزم شنوة ذنبي آنا؟ انا مشاعري واحاسيسي فادة منهم نزيد نتلهى بمتاع غيري؟

ياخي إلي يحس روحو اڨريسي معناها بالرسمي فما شكون اڨرسّاه؟

آوَخّي...