وانا نعمل في دورة في البلوڨسفار التونسية، نلقا ليان متاع بلوڨور على فايسبوك، عملت طلة وماو مانيش برباشة حتى طرف، دخلت نطل فالتصاور، وانا ندور طحت على تصويرة باش تعديلي نهار ...
التصويرة فيها شاب ما يفوتش 16 سنة، مانجمش نعطيه اكثر اما إنجم نعطيه اقل! الشاب هاذا مطيش في القاعة راقد، بحذاه كارطابتو وكرسي وردّان وللموضوعية باش ننقلل التعليق الوارد تحت التصويرة كيماهو :" تلميذي... بعد ما رد مصارنو، يعمل في تعسيلة... اليوم أقر مجلس التربية الرفت النهائي في حقو بسبب حالة السكر الواضح اللي كان عليها"
وجاء في تعليق للاستاذ مبعد يقول فيه الي الطفل هاذا طردوه 15 يوم من اجل لعبو في القسم بالجوال و تبين إنو الجوال فيه بورنو...
نحب نفهم حاجة، إذا كان المدرسة إلي طردتو حست روحها تمست كي هو في تاليفونو الشخصي حاط بورنو، وطردتو 15 يوم لواش توة تبرات منو و طردتو ديفينيتيف؟ ياخي ما تدخل كان كيف تولي مسالة كلوف وحرية شخصية وتجبد روحها كيف تولّي مسؤولية؟ وشبيها ماتدخل كان باش تعاقب ولا تردع؟ وحتى كان اعتمدت التاطير، كان المؤطرين من نوع الاستاذ الّي كاتب التعليق ومصور تلميذو و حاطلو تصويرتو على فايسبوك لا حشمة لا والو الطفل عندو الحق يزيد يدخل بعضوا! موش مأطر عندو بورنو في تاليفونو، اطروه جاهم بَالْعو للمعهد
وكان التربية مسؤولية الوالدين كهو، لواش اسمها وزارة التربية والتعليم، والتربية قبل التعليم؟ نجم نفهم طردوه خاطر الدولة موش مستعدة باش تصرف على شكون مايحترمش حرمتها كيما القانون إلي هي تحطو والنظام الداخلي للمؤسسة اللّي تمثلها، كي مايطبقش قانونها يمشي يشوف مؤسسة خاصة اخرى يتعلم فيها كيما يساعدو!!و فيني مسؤولية التربية والتعليم تجاه المجتمع كيف ترمي مراهق هكّا البرة؟
كان السيستام * خرج پروف، استاذ، مربي مسؤول يصور وينشر صورة تلميذو بالطريقة هاذي شنوة نستناو من تلميذ مراهق ؟
و كان الطْفُل طردوه الاستاذ شنوه يعملولو؟
و شنوة يقصدو بطرد التلامذه في العمر هاذاك؟ القانون هذا معاقب ولا رادع؟
والمشكلة في التلميذ كيف رد في المدرسة؟ و على خاطر الي ردو كحول! علما إنو ماشربهاش في المدرسة! معناها إلي قلق هو الإعتداء على حرمة المكان إلي تمثل في جيانو سكران سكر واضح اللي حتى القانون يعاقب عليه فالشارع موش بالنفي المؤبد بيانسور!
وهل طردوه خاطر فشلو باش يربيوه؟ خاطر مانجموش يقولولو الكحول راهي موش متاع عمرك والناس كي تعمل حاجة لازمها تكون قدها ولاموش لازم تعلمها؟ ياخي حكاولو على الكحول ولا آذيكا من مهمة الوالدين إلي فما حالتين: ياما مايحكيولوش ولا ماعندهمش كومبلاكس متاع ألكول وفي الحالة هاذي يطلع فنان موش يسكر و يمشي يقرى! وكان هو صغير على الكحول، الحاجة الوحيدة إلي يمكن الناس لكل توافقني فيها، لواش نحملوه مسؤولية وجودو في مجتمع مطرد فيه مالقراية؟ خاطر الصغير موش حر وإلي موش حر موش مسؤول.
وياخي ذكرو هاذا في النظام الداخلي ولا سي إڢيدون؟ وياخي إلي يخالفو النظام الداخلي كيما لبس الحجاب وإطالة الذقن ياخذو طرد؟ ولّا المسؤولين يتعاملو مع الكحول إلي هي حاجة محرمة عقائديا من منطلق شخصي والعقاب القاسي هذا جاء خاطر اقوى من حرمة المؤسسة والدولة ذات الدين فما حرمة الدين إلي الناس لكل منصبة روحها مدافعة عليه! هذا يعني إنو في دولة لائكية يكون العقاب هو بيدو ولّا نظام الدولة اللائكية ما يخرجش عباد هكّا؟؟
هاذي المشكلة! و في حكاية الطرد مانعرفش شكون نحمل المسؤولية! طرف من السيستام يقول لازمو يطرد وبالفعل يطرد، و طرف آخر كيف كيف من السيستام يصورو و يحطلو تصويرتو في فايسبوك يتمقعر عليه، وطرف آخر من السيستام يبيعلو كحول وهو موش راشد! هاذا الكل وماعناش علم بمدى تأثير الاطراف الاخرى في الحكاية هاذي!
و للاسف ماعنديش اجوبة الاسئلة هاذي!هذا لا يمنع اني عندي فكرة على ردة فعلي كان جيت صاحبة القرار في ما يخص التلميذ والاستاذ، وإلّي نعرفو إلي باش نعاقب الاستاذ اكثرمن التلميذ!
السيستام *: والمقصود هوالمتداول من الاطراف الفاعلة في المجتمع، إقتصاديا، اجتماعيا، "ثقافيا" إلخ إلخ...
Articles
